Eagles með nýtt efni

Gömlu brýnin í Eagles munu gefa út sína fyrstu stúdíóplötu síðan árið 1979 núna í októbermánuði á þessu ári. Tími til kominn myndi einhver segja, tjaaa... ekki hef ég saknað þeirra neitt sérstaklega og af fyrsta síngli plötunnar að dæma þá er ekki von á neitt sérstaklega góðu.

Vídjó við lagið "How long" af væntanlegri plötu Eagles-manna "Long road out of Eden".

Gárungarnir segja að vídjóið sé í svart/hvítu vegna þess hversu gamlir Frey, Henley og félagar séu orðnir - þetta er örugglega ódýrara en slatti af almennilegu make-uppi á þessa ellismelli. Og til þess að hafa eitthvað jákvætt við þessa færslu þá er hér hið ódauðlega "Hotel California", þarna þekki ég ykkur!

Þrjár kántrýskotnar plötur

Hef verið að hlusta mikið á þrjár plötur að undanförnu og allar eiga þær það sameiginlegt að vera kantrýskotnar. Þetta eru nýjustu afurðir Ryan Adams, Cherry Ghost og Iron & Wine.

Easy tiger – Ryan Adams [2007]
Þetta er ein af þessum plötum sem heilla mann strax frá fyrstu hlustun, það er einhver stemning þarna sem hrífur mann með sér. Hef ekki gefið Ryan neinn sérstakan gaum í gegnum tíðina, hef heyrt hluta úr plötum og lög hér og þar á ferlinum – þetta er níunda stúdíóplata kappans og sú fyrsta síðan 2005, en það ár gaf hann út hvorki fleiri né færri en þrjár breiðskífur. Platan er góð, stútfull af ljúfum jaðarköntrý-lögum. Mæli klárlega með þessu eintaki.

Hápunktar: “Goodnight Rose”, “Off Broadway” og “Pearls on a string”. (hlusta hér til hægri ->)
Einkunn: 8.0

Fróðleiksmoli: Platan er gefin út af Lost Highway Records en þar eru á mála nöfn eins og Elvis Costello, Eagles, Van Morrison og Willie Nelson.

[myspace] [youtube] – vídjó við lagið “Halloween head”

Thirst for romance – Cherry Ghost [2007]
Helstu áhrifavaldar þessarar bresku sveitar eru ekki af verri sortinni: Sparklehorse og Smog. Debjúplata sveitarinnar er gríðarlega viðkunnaleg og þægileg áheyrnar, það er ekkert nýtt svo sem í þessu: áheyrilegt köntrýskotið indírokk. Cherry Ghost hefur fengið ágætis viðbrögð í heimalandinu, platan stökk til að mynda strax í #7 á breska vinsældarlistanum vikuna sem hún kom út. Potturinn og pannan í þessu bandi er Simon nokkur Aldred og þar á ferðinni er nokkuð lunkinn lagasmiður, eins og lögin í spilaranum hér til hægri gefa til kynna. Allt í lagi plata bara.

Hápunktar: “Thirst for romance” og “4AM”. (hlusta hér til hægri ->)
Einkunn: 6.5

Fróðleiksmoli: Jimi Goodwin, söngvari Doves, lemur trommur í laginu “People help the people”.

[myspace] [youtube] – vídjó við lagið “People help the people”

Sheperd’s dog – Iron & Wine [2007]
Þriðja breiðskífa Sam Beam, betur þekktur undir nafninu Iron & Wine, er væntanleg í plötuverslanir í lok næsta mánaðar. Ég fékk eintak af plötunni á silfurfati fyrir nokkrum vikum síðan og hef verið að melta plötuna um skeið. Mér finnst önnur breiðskífa kappans (“Our endless numbered days”) vera tært fyrirtak, akústísk og smekklega matreidd. Þessi breiðskífa er aðeins þyngri í vöfum, draumkenndari er kannski rétta orðið, en kemur það síður en svo niður á gæðum. Platan er þeim einstaka eiginleika gædd að vera heilsteypt og renna smurt í gegn án nokkurra hnökra (lesist: án laga sem þarf að “skippa” fram hjá). Góð plata hér á ferð.

Hápunktar: “White tooth man”, “Carousel” og “Boy with a coin”. (hlusta hér til hægri ->)
Einkunn: 8.0

Fróðleiksmoli: Sam Beam er sprenglærður kappi, er með MFA-gráðu (Master of Fine Arts) frá Florida State University Film School.

[myspace] [youtube] – "læv"-upptaka af "Boy with a coin “

Zombies

Tvö af flottari lögum 7. áratugarsins... með drengjunum í Zombies, band fyrir hugsandi menn og konur:

She's not there


Time of the season (orginal lagið en því miður bara eitthvað slædsjóv sem keyrir.... en lagið heyrist)


Og að lokum, smá portrait af Zombies unnið af einhverjum aðdáanda á Youtube, gefur ágætis mynd (og hljóð) af því sem þessi vanmetna sveit gerði hér á árum áður.

Svör við lagabútagetraun

Þetta hafðist fyrir rest - það var þó enginn með þetta allt rétt, allavega ekki í einni bunu. Gengur betur næst. Hér eru svörin.

1. Planet telex - Radiohead


2. A means to an end – Joy Division
Fann ekkert vídjó. En hér geturu nálgast lagið.

3. Last nite - Strokes


4. If I ever feel better - Phoenix


5. Moonlight shadow – Mike Oldfield


6. Lolita - Prince
Fann ekkert vídjó, en hér er lagið.

7. Heaven is a place on earth – Belinda Carlisle


8. Election day - Arcadia


9. 1979 – Smashing Pumpkins


10. Village Green Preservation Society - Kinks


11. Golden skans - Klaxons


12. Keeping the dream alive - Freiheit


13. While my guitar gently weeps - Beatles

Nokkuð merkileg upptaka af þessu lagi: væntanlega á Elton John-tónleikum en þarna eru m.a. Ringo Starr, Eric Clapton og svo auðvitað George Harrison. Ég myndi skjóta á að þetta væri frá 80s, allavega af hárgreiðslu og outfittinu á George að dæma!

14. Live forever - Oasis


15. Dream of sleep - Ghostigital

Þetta er örstutt læv-brot frá því að Ghostigital hitaði upp fyrir Björk í Vancouver núna í vor/sumar. Ef þú vilt heyra lagið í heild sinni, sem ég mæli klárlega með, smelltu þá hér.

Vantar enn tvö lagabrot!!

Ætla ég að reynast sannspár? Það vantar ennþá lagaheiti og flytjanda á brotum númer 2 og 6. Allt annað er komið:

1. Radiohead - Planet Telex
2. --------
3. The Strokes - Last Nite
4. Phoenix - If I ever feel better
5. Mike Oldfield - Moonlight Shadow
6. -------
7. Belinda Carlisle - Heaven is a place on earth
8. Arcadia - Election Day
9. Smashing Pumpkins - 1979
10. Kinks - Village green preservation society
11. Klaxons - Golden Skans
12. (Münchener) Freiheit - Keeping the dream alive
13. The Beatles - While my guitar gently weeps
14. Oasis - Liver Forever
15. Ghostigital - Dream of sleep

Vísbending vegna #2: lagið er frá upphafi 9. áratugsins og með hljómsveit sem dregur nafn sitt frá bók úr seinni heimstyrjöldinni. (nafn hljómsveitarinnar kemur fyrir í bókinni en ekki í titllinum)
Vísbending vegna #6: Þetta lag kom út í fyrra og er að finna á tuttugustu og þriðju breiðskífu listamannsins, platan heitir tölustöfum.

 Látum þetta meltast yfir helgina og sjáum hvað setur.

Tvö góð svona rétt fyrir helgina

Modest Mouse - Missed the boat

Ryan Adams & The Cardinals - Two

Þekkir þú þessi lög?

Jæja, víst að síðasta lagabútagetraun tókst svona vel þá er alveg málið að koma með aðra. Ég hef grun um að þessi sé örlítið erfiðari og ætla að gerast svo frakkur á spá því að enginn nái þessu rétt! (aðeins að ögra ykkur).

Reglurnar eru einfaldar, ég spyr um lagaheiti og flytjanda í öllum bútunum. Þetta eru í allt 15 lagabútar, hver þeirra er nákvæmlega 6 sekúndur að lengd og í flestum tilfellum fann ég stað í laginum þar sem enginn söngur er (bara til þess að gera þetta erfiðara en jafnframt skemmtilegra). Þó læðist inn á milli smá söngur í nokkrum bútum, ekki mikið þó.

Lagabútagrauturinn er í spilaranum hér til hægri og heitir "Getraun-Getraun".

Svarið vinsamlegast í athugasemdakerfið hér fyrir neðan. Endilega svarið þó svo að þið þekkið aðeins nokkra búta, það er gott innlegg í púslið sem á endanum (vonandi) gengur upp.

Góðar stundir.

Kaupþing vs. Landsbankinn

Athyglisvert að sjá þessa "tónleikarimmu" bankanna. Greinilegt er að Kaupþing stílar inn á ríka, metta og flotta liðið (það sama og fer að sjá Stuðmenn og Sálina í Kaupmannahöfn!) á meðan Landsbankinn býður upp á tónlist fyrir alla landsmenn.

Sjáiði bara line-uppið:

Kaupþing, föstudagskvöldið 17. ágúst á Laugardalsvelli
Bubbi Morthens
Stuðmenn
SSSÓL
Björgvin Halldórsson
Garðar Thor Cortes
Todmobile
Nylon
Strákasöngsveitin Luxor
Veislustjóri: Páll Óskar.
Tónlistarlegur ráðgjafi: Einar Bárðar (mitt innskot, en það hlýtur bara að vera!)

Hér geta 5-15 ára og svo 35 ára og eldri skemmt sér konunglega. Ef þú ert hins vegar 15-35 ára þá á þér eflaust eftir að leiðast... nema að þú sért bara kominn til að sýna þig og sjá aðra (Sálin í Köben, anyone?)

Landsbankinn, laugardagskvöldið 18. ágúst á Miklatúni
Ampop
Á móti sól
Eivör ásamt hljómsveit
Ljótu hálfvitarnir
Mannakorn ásamt Ellen
Megas og Senuþjófarnir
Mínus
Pétur Ben
Sprengjuhöllin
Vonbrigði

Þarna ertu með eitthvað fyrir alla, sé reyndar ekkert í fljótu bragði sem myndi virka fyrir þau allra yngstu, jú ætli Magni (Á móti sól) dekki ekki þann hóp. Rás 2 er auðvitað með í þessu og þeir náttúrulega með mikla þekkingu á því hvað sé vinsælt í dag. Spurning hvort að Kaupþing hafi talað við Bylgjuna og spurt þá hvað sé að virka í dag?

Landsbankinn vinnur þessa rimmu með yfirburðum (og þá er aðeins litið á tónlistarlegu hliðina), svo er hins vegar annað mál hvernig mætingin verður. Landsbankinn klárlega með gott forskot vegna Menningarnætur og svo veit maður aldrei hvernig veðrið verður.

En þetta er auðvitað bara mín skoðun og er hún algjörlega gegnumlituð af mínum tónlistarsmekk.

Kaupþing heldur tónleika í tilefni af afmæli

Diskóhiti

Ég kíkti við í eina af betri plötubúðum borgarinnar á dögunum og þá var lag í spilaranum hjá þeim er ég gekk inn sem greip mig alveg um leið. Það er allt of sjaldan að maður lendir í þessu... ég fór svo að grennslast fyrir um þetta lag og komst að því að kappinn heitir Calvin Harris og gaf nýlega út plötuna "I created disco".

Lagið sem ég heyrði heitir "Disco heat" og finnst mér grúvið í því lagi alveg hrikalega grípandi. Hlustað á lagið hér til hægri -->

Nú er bara að næla sér í plötuna, en hún kom út um miðjan júní á þessu ári. Calvin þessi er Skoti, fæddur í Dumfries í Skotlandi en hefur búið í Lundúnum lengi vel. Eins og svo margir aðrir var að hann búa til tónlist inni í svefniherbergi með misjöfnum árangri. Hann er einn af þeim sem uppgötvuðust í gegnum myspace (Lily Allen, Arctic Monkeys....), en EMI plöturisinn nældi í kappann í fyrra, þá var hann að vinna við að raða í hillur í Marks & Spencer.

Stærsti "hittarinn" hans er án efa "Acceptable in the 80s" (hlustaðu hér til hægri -->) sem er mjög lýsandi fyrir tónlistarstefnu Harris, en þetta er elektrómúsík með mikilli skírskotun í þann ágæta áratug, 80s. Gríðarlega danshvetjandi tónlist hér á ferð.


Myndband við lagið "Acceptable in the 80s".

Calvin Harris - Myspace
Calvin Harris  - Official
Calvin Harris - Youtube

Í hnotskurn: tvær íslenskar plötur

Kominn tími til að hlusta á íslenska tónlist. Hef verið að rúllu nýjum plötum með Stafrænum Hákon og Amiinu í gegn upp á síðkastið.

Í hnotskurn: Gummi – Stafrænn Hákon [2007]
Fimmta breiðskífa Stafræns Hákons (Ólafs Joshepssonar) kom út fyrr í sumar og marka ákveðin tímamót hjá honum. Þetta er í fyrsta sinn sem að það er sungið af einhverju ráði í lögum hans, tónlist hans hefur hingað til verið instrúmental. Tími til kominn myndi einhver segja og aðrir kannski svartsýnir á það hvernig þessi kokteill yrði. Af níu lögum þá eru 6 með söngi en restin (þrjú lög) upp á gamla góða Hákons mátann.

Platan sem heild er góð, inná milli eru nokkrar virkilega góðar lagasmíðar (t.d. “Svefn”, “Rjúpa” og “Thurr Thurr”) en svo eru líka einstaka lög sem skilja lítið sem ekkert eftir sig (t.d. hið 10 mínútna langa “Kvef”). Að mínum dómi er þetta rökrétt ákvörðun hjá Hákon að krydda gítarsveimið sitt með söng og finnst mér honum takast vel upp á Gumma. Aðdáunarvert hvernig honum tekst að láta sönginn falla vel inní lögin í stað þess að söngurinn leiði eins og venja er, það finnst mér koma vel út. Gott eintak hér á ferð.

Hápunktar: “Svefn” og “Rjupa”. (hlustaðu á lögin hér til hægri-->)
Einkunn: 8.0

Fróðleiksmoli: Stafrænn Hákon spilar ásamt hljómsveit á næstu Airwaves-hátíð. Kominn tími til!

[myspace] [youtube] – lagið “Eder”, af plötunni Ventill/Poki, spilað læv í Birmingham árið 2004


Í hnotskurn: Kurr – Amiina  [2007]
Krúttpjásurnar úr Amiinu komu með sína fyrstu breiðskífu á þessu ári og ber hún nafnið “Kurr”. Eftir nokkurra ára bakcup fyrir Sigur Rós var kominn tími til að þessar hæfileikaríku stúlkur létu ljós sitt skína og skín það ljós nokkuð skært á debjúplötunni. Ég ætla að sleppa klisjunni um íslenska náttúru, álfa og huldufólk, enda er það ekki það sem fer í gegnum hugann þegar þessi plata rúllar. Það er einhver ólýsanleg ró og yfirvegun sem þyrmist yfir mann á þessari plötu, hvert lag hefur sína melankólísku stemningu – reyndar þegar síga fer á seinni hlutann þá fer þessi ró að breytast í þreytu og kannski löngun í að eitthvað komi manni á óvart, því helsti ókostur plötunnar er hvað lögin eru fyrirsjáanleg. Heilt yfir er þetta fínasta frumraun.

Hápunktar: “Rugla” og “Seoul” (hlustaðu á lögin hér til hægri-->)
Einkunn: 7.0

Fróðleiksmoli: Fræðstu meira um stúlkurnar í 9 mínútna myndbandi um kvartetttinn og nýju plötunna þeirra, hér.

[myspace] [youtube] – “Seoul” læv í íslensku sjónvarpi

Daft Punk að stela frá Apparat Organ Quartet?

Ég var að skrolla í gegnum Pitchforkmedia um daginn og rakst á þessa mynd af franska dúettnum Daft Punk. Þessi mynd er tekin á tónleikum þeirra í Seattle í Bandaríkjunum þann 28. júlí síðastliðinn.


Mér fannst þetta merki þeirra (það sem þeir gera með höndunum) vera mjög kunnuglegt og rámaði í að hafa séð þetta gert áður á tónleikum. Jú, gott ef að íslensku Apparat Organ Quartet væru ekki vanir að gera þetta á tónleikum sínum. Ég hef séð þá nokkrum sinnum læv og voru meðlimir sveitarinnar duglegir að gefa þetta merki á milli laga.

Mér tókst að finna mynd af Apparat gera þetta á tónleikum, hér er mynd af Apparat á Airwaves í október árið 2006. Þar má sjá Úlf Eldjárn gera þetta sama merki.


Ekki veit ég hvað meiningin með þessu merki er, á þetta að vera þríhyrningur, tígull eða hjarta? Skiptir kannski ekki máli, en það athyglisverða er hvor sveitin var á undan að nota þetta á tónleikum? Hafa Daft Punk séð Apparat á tónleikum? Eða öfugt?

"Around the world" með Daft Punk


"Romantika" með Apparat Organ Quartet

Ný plata væntanleg með Apparat
Heyrst hefur að Apparat-menn hafi lokið innspilun á nýrri breiðskífu og eftirvinnsla sé í gangi þessa dagana. Ætli þeir stefni ekki á að koma henni út fyrir jólin? Það er óhætt að segja að þessari breiðskífu hafi verið beðið með mikilli eftirvæntingu, enda hefur Apparat verið ca. 5 ár að fylgja debjú-plötunni eftir. Sú kom út árið 2002 en Apparat var stofnuð árið 1999 þá sem eitt af tilraunaverkefnum Tilraunaeldhússins (Kitchen Motors). Það tók ca. 3 ár að gera þá plötu.

Eina lagið af nýju plötunni sem fengið hefur opinbera spilun er "Konami" en það var flutt í Kastljósinu á RÚV í lok janúar á þessu ári.

Á mæspeisi sveitarinnar er lítið gefið upp hvað varðar nýju plötuna en þar má sjá að þeir spila í Gent í Belgíu í september. Einnig heyrði ég af því að þeir munu spila á tónlistarhátíðinni "Reykjavik to Rotterdam" í nóvember, ásamt fjöldanum öllum af íslenskum hljómsveitum.