White Stripes, Interpol og The National

Þrjár plötur hafa fengið að rúlla í tækinu upp á síðkastið, þetta eru "Icky thump" með White Stripes, "Our love to admire" með Interpol og svo "Boxer" með The National.

Í hnotskurn: Icky Thump – White Stripes [2007]
Að hugsa sér að það séu liðin 10 ár frá því að White stripes kom fyrst fram á sjónarsviðið. Nýjasta plata dúettsins er afar hrátt kvikindi, hún er tekin upp á tæpum þremur vikum og er það merkilegt nokk lengsta upptökuferli sveitarinnar til þessa! Þetta er pjúra hrátt og nakið rokk og ról, þó í bland við áður óheyrð áhrif (hjá WS), m.a. sekkjapípur og almenn mariachi-stemning. Ætli Jack White láti ekki Raconteurs-frontið sitt sjá um hlustendavæna tónlist og noti dúettinn með systur/kærustu (?) sinni til þess að blúsa aðeins og leika sér með gítarmagnarana í Nashville? Gott plan. Ég er nokkuð ánægður með þessa plötu, svolítið erfitt að átta sig á henni en hún verður betri við hverja hlustun og það veit á gott.

Hápunktar: “300 M.P.H. Torrential Outpour Blues” og “Prickly Thorn, But Sweetly Worn”. (hlustið hér til hægri)
Einkunn: 7.0

Fróðleiksmoli: White Stripes hafa, ólíkt flestum öðrum hljómsveitum, verið mjög duglegir við að leka EKKI lögum á netið áður en plötur þeirra koma út. En nokkrum vikum áður en að “Icky Thump” kom út var hún spiluð í heild sinni á útvarpsstöðinni Q101 í Chicago, þetta var í algjöru leyfisleysi. Jack White hringdi brjálaður í útvarpsstöðina og lét þá heyra það. Sögusagnir eru uppi um að plötufyrirtækið (Warner) hafi lekið plötunni til stöðvarinnar í kynningarskyni.

[myspace] [youtube] - myndband við titillag plötunnar


Í hnotskurn: Our love to admire – Interpol [2007]
Verð að játa það að ég hef aldrei gefið þeim félögum í Interpol mikinn sjéns í gegnum árin, á hvorugar plöturnar þeirra en ákvað að næla mér í þá nýjustu eftir að ég heyrði fyrsta síngulinn ("The Heinrich Maneuver"). Mér líkar vel við þennan myrka indí-stíl sem þeir keyra á, greinileg Joy Division-áhrif í gangi og slatti af þunglyndi. Góður kokteill að mestu leiti en verður mjög fljótt einsleitur. Það eru nokkrar mjög góðar lagasmíðar á þessari plötu en mér finnst vanta nokkuð upp á til þess að hægt sé að tala um góða plötu. Þetta eintak er yfir meðallagi.
 
Hápunktar: “Pioneer to the falls” og “The Heinrich Maneuver” (hlustið hér til hægri)
Einkunn: 6.5

Fróðleiksmoli: Interpol eru taldir tilheyra “post-punk-revival” bylgjunni sem ruddi sér rúms á upphafi þessarar aldar. Skilgreiningin á þessari tónlistarbylgju er nokkurn veginn þannig að þetta er blanda af indírokki, póst-pönki og elektróník. Fleiri bönd sem tilheyra þessari bylgju eru t.d. Strokes, Liars, Yeah Yeah Yeahs og The Rapture. Pjúra póst-pönk hljómsveit og fánaberi þeirrar bylgju, ef út í þá sálma sé farið, er án efa Joy Division.

[myspace] [youtube] - myndband við lagið "The Heinrich Maneuver"


Í hnotskurn: Boxer – The National [2007]
Fjórða stúdíóplata The National kom út í maí síðastliðnum en ég er reyndar bara tiltölulega nýbúinn að næla mér í eintak. Mikið hefur verið ritað og rætt um ágæti þessarar plötu og margir góðir dómar birst á öldum ljósvakans. Platan er ansi góð, því er ekki að neita. Sveimkenndi baritónninn hann Matt Berninger er frontur sveitarinnar og skapar hann skemmtilega melankólíska stemningu á þessari plötu, og ekki eru textar hans í slakari kantinum. Fyrir utan upphafslagið, “Fake empire”, er enginn augljós hittari á þessari plötu, heldur er hún mjög jöfn heilt yfir. Gott eintak hér á ferð.

Hápunktar: “Fake empire”, “Green gloves” og “Start a war”. (hlustið hér til hægri)
Einkunn: 7.5

Fróðleiksmoli: Myndin á plötuumslaginu er af hljómsveitinni þegar hún spilaði í brúðkaupi upptökustjórans síns, Peter Katis. Til gamans má geta að Peter þessi pródúseraði einmitt fyrstu tvær plötur Interpol, en ekki þá þriðju sem er hér að ofan.

[myspace] [youtube] - myndband við lagið "Mistaken for strangers"

Athugasemdir

[Ingi Björn Sigurðsson, 18.7.2007 kl. 18:52]

Áhugaverðar plötur sem þú tekur fyrir. Ég hef tekið undarlegt ástfóstur við interpol. Ég keypti plötuna Bright Lights eftir að Antics var komin út. Ég er búin að hlusta endalaust á þá plötu og á ekki en Antics. Ætli ég láti ekki verða af því fyrst þriðja platan þeirra er komin út. 

White Stripes er merkileg hljómsveit sem hefur algjöra sérstöðu, ég náði í plötuna þeirra í gegnum Torrent og á eftir að tékka á henni.

National er forvitnileg hljómsveit, tékk á henni þegar ég hef tíma.. 

[Stígur Helgason (IP-tala skráð) 18.7.2007 kl. 19:11]

Sammála þér með National, mjög flott plata. Icky Thump er fín en nýja Interpol finnst mér algjör yfirpródúseruð hörmung.

[Ragga (IP-tala skráð) 18.7.2007 kl. 19:40]

Eina platan sem ég hef virkilega kynnt mér af þessum lista er Icky Thump og ég er ánægð út í gegn.