6 laga mixteip: sumarskap

5.7.2007 | 23:06

Ákvað að finna til 6 lög sem koma mér í gott skap, ja... sumarskap ef þið viljið. Þessi lög eru valin af handahófi og koma héðan og þaðan úr safni mínu. Lögin eru öll að finna í tónlistarspilaranum hér til hægri (merkt #Mix: flytjandi-lagaheiti) sem og má sjá myndbönd við lögin (stundum læv) í boði jútjúb hér fyrir neðan.

Mr. Blue sky - Electric Light Orchestra (1978)
Eftir að ég byrjaði að hlusta mikið á Bítlana á sínum tíma þá komst ég fljótlega í kynni við Jeff Lynne og þá snilld sem hann var að gera með ELO. “Mr. Blue Sky” kemur mér ávallt í gott skap. Lagið hefur verið mikið notað í auglýsingaskyni, stórir retailer-ar eins og Marks & Spencer, Sears og fleiri hafa notað lagið. Margir muna einnig eftir herferð 365 fjölmiðla hér á landi í fyrra að mig minnir og hljómaði lagið undir í auglýsingunni. Hér er það læv í Top of the Pops:

Ain´t no easy way out – Black Rebel Motorcycle Club (2005)
Frábært lag af frábærri plötu “Howl” sem kom út síðsumars árið 2005. Platan var mikil kúvending fyrir BRMC, frá því að spila nokkuð hrátt þjóðlagabílskúrs-rokk var komið meira blúsað og akústískara sánd hjá tríóinu. Þetta fór misvel í gagnrýnendur eins og gengur og gerist. Ég fíla hins vegar þessa plötu í tætlur, þetta lag er með þeim sterkari á plötunni. Hérna spila þeir lagið læv í Ft. Lauderdale USA:

She don´t use jelly – Flaming Lips (1993)
Fyndið að þetta sé stærsti smellur sveitarinnar “ever”, ekki það að þetta sé það besta sem þeir hafi sent frá sér. Það skemmdi ekki fyrir að lagið var spilað í hinum geysivinsæla þætti Beavis & Butthead á MTV sem og að sveitin kom fram í ekki ómerkari þætti en Beverly Hills 90210 og flutti þetta lag á skólaballi. Eftir sveitin hafði spilað lagið þá átti Steve Sander þá fleygu setningu: “You know, I've never been a big fan of alternative music, but these guys rocked the house!” Lagið er hressandi, gítarriffið ógleymanlegt og afar grípandi.

The skin of my yellow country teeth – Clap Your Hands Say Yeah (2005)
CYHSY voru á allra vörum árið 2005 og komu með ótrúlega ferska vinda inn í músíkina. Það má segja að Pitchforkmedia hafi startað þessu hæpi með góðum dómi um plötuna þeirra “Clap your hands say yeah” sem kom út þarna um sumarið. Platan er ein af þeim bestu þetta árið að mínum dómi og þetta lag kemur mér alltaf í góðan gír. Hérna er læv-útgáfa tekin upp á tónleikum í Dyflinni:

Dom andra – Kent (2002)
Sænsku Kent eru mjög svo stórt nafn í Skandinavíu en hafa aldrei náð mikilli hylli utan hennar, allavega ekki af einhverju ráði. Á fimmtu breiðskífu sveitarinnar, “Vapen & ammunition” frá árinu 2002 er þetta stórgóða lag að finna, “Dom andra”, eða á íslensku: hinir. Myndbandið er voðalega sænskt eitthvað:

The sun ain´t gonna shine anymore – Walker Brothers (1966)
Margir þekkja Scott Walker, hann átti að margra mati eina bestu breiðskífu síðasta árs “The Drift”, skífa sem ég hreinlega gat ekki hlustað á! Það er kannski færri sem vita að hann var í tríóinu Walker Brothers á sjöunda og áttunda áratugi síðustu aldar. Þetta voru reyndar engir bræður, það þótti bara vera meira kúl og bissness-vænlegra að gefa sig út fyrir að vera þrír sætir bræður frá Kaliforníu. Lagið gerði góða hluti árið 1966, sérstaklega í UK (þeir voru frá USA). Sögur herma að Walker-bræður hafi verið með stærri aðdáendaklúbb en sjálfir Bítlarnir á þessum árum, látum það vera! Fínt lag engu að síður, á stundum vel við yfir sumartímann.