Strawberry Jam - Animal Collective [2007]

Áttunda breiðskífa Animal Collective-flokksins er hreint út sagt frábær! Fyrir mér er þetta þriðja breiðskífa sveitarinnar, ég kom fyrst um borð árið 2004 á plötunni "Sun tongs" sem mér finnst vera mjög góð, "Feels" kom svo árið 2005 og hana var ég ekki að fíla neitt sérstaklega. Sama ár kom út EP-platan "Prospect hummer" í samstarfi við költið Vashti Bunyan, ekki var það neitt spes.

Þessi plata, "Strawberry jam", er mögnuð frá upphafi til enda. Ég ætla að ganga svo langt að segja að þetta sé Pet Sounds okkar tíma. Þarf ég að segja eitthvað meira? Þetta er melódísk og ákaflega vel skipulögð ringulreið, stórbrotnar lagasmíðar, magnaðar útsetningar, sköpunargleði og ævintýramennska af dýrari sortinni, raddanir og raddútsetningar í "ruglinu" (þ.e. flottar)  - það er sko erfitt að setja verðmiða á þessa breiðskífu. Þetta er besta plata ársins til þessa (af þeim sem ég hef heyrt auðvitað!). Ef þú ætlar bara að kaupa þér eina plötu á þessu ári, kauptu þá "Strawberry Jam".

Hápunktar: "Peacebone", "For Reverend Green", "Fireworks" og "#1". (lögin eru öll í spilaranum hér hægra megin ->)

Einkunn: 9.5

Fróðeiksmoli: Avey Tare syngur megnið af lögunum á þessari plötu en vanalega skipta þeir félaganir, hann og Panda Bear, þessu þokkalega bróðurlega á milli sín. Þess má geta að Avey þessi, sem heitir reyndar David Portner, er giftur hinni íslensku Kristínu Önnu Valtýsdóttur. En Kristín var jú áður í Múm.

Vídjó: Animal Collective taka lagið "#1" í þætti Conan O'Brien.


[web] [mæspeis] [jútjúb]

Athugasemdir

[kristjangud (IP-tala skráð) 15.10.2007 kl. 20:50]

Stór orð... en ég held barasta að ég taki undir þau. Húrra fyrir Animal Collective

[Egill Harðar (IP-tala skráð) 15.10.2007 kl. 21:35]

Ég á nú bágt með að taka undir að þetta sé Pet Sounds okkar tíma því svo góð er platan ekki. En hún er góð og vinnur á en svona tilraunapopp er ekki fyrir alla og sjálfsagt allt of strembið fyrir flesta.